अर्थमन्त्री डा. स्वर्णिम वाग्ले ले सरकारले आर्थिक सुधार र आर्थिक रुपान्तरणलाई केन्द्रमा राखेर काम गरिरहेको बताएका छन्। पर्सा र बाराका उद्योगी व्यवसायीसँगको अन्तरक्रिया कार्यक्रममा उनले अर्थतन्त्र सबल बनाउने, राजस्व प्रणाली सुधार गर्ने र निजी क्षेत्रलाई प्रोत्साहन गर्ने नीति अघि बढाइएको बताए।

उनले उच्चस्तरीय आर्थिक सुधार आयोगको प्रतिवेदन कार्यान्वयन प्रक्रिया सुरु भइसकेको र त्यसपछि अर्थतन्त्रमा देखिएका समस्या क्रमशः समाधान हुँदै जाने विश्वास व्यक्त गरे। आगामी बजेट आर्थिक रुपान्तरण, निजी क्षेत्रमैत्री वातावरण, कर प्रणाली सुधार र प्रक्रियागत झन्झट हटाउनेतर्फ केन्द्रित हुने उनले बताए।

कार्यक्रममा वीरगन्ज उद्योग वाणिज्य संघ का अध्यक्ष हरि गौतम ले उद्योगी व्यवसायीले भोग्दै आएका नीतिगत समस्या समाधान, औद्योगिक क्षेत्र स्थापना, कर प्रणाली सुधार र सीमा क्षेत्रमा हुने अवैध कारोबार नियन्त्रण गर्न सरकारसँग माग गरेका थिए। कार्यक्रममा विभिन्न सरकारी अधिकारी तथा उद्योगी व्यवसायीहरूको सहभागिता रहेको थियो।