कारोवार हुने हप्ताको अन्तिम दिन शेयर बजार उच्च अङ्कले बढेको छ। नेप्से परिसूचक आज ६४.६७ अङ्कले बढेर २ हजार ८७७.०२ विन्दुमा पुगेको छ।

सबै समूहको शेयर मूल्य बढ्दा विकास बैंक समूह सबैभन्दा बढी ३.९५ प्रतिशतले उकालो लागेको छ। आज २४० कम्पनीको शेयर बढेको, २२ कम्पनीको घटेको र २ कम्पनीको शेयर स्थिर रहेको छ।

कर्पोरेट विकास बैंक, सालपा विकास बैंक, रिलायन्स स्पिनिङ मिल्स र सोलु हाइड्रोपावरको शेयर १० प्रतिशतले बढेको छ भने नेपाल लाइफ समृद्धि लगानी योजनाको शेयर सबैभन्दा धेरै ५.१२ प्रतिशतले ओरालो लागेको छ।

नेप्सेसँगै कारोबार रकम पनि उल्लेखनीय बढेको छ। हिजो १२ अर्ब ३ करोड रुपैयाँको कारोबार भएकोमा आज ३४२ कम्पनीका ५ करोड ६९ लाख कित्ता शेयर २१ अर्ब २२ करोड रुपैयाँमा किनबेच भएको छ।