नेपाल आयल निगम ले पेट्रोल, डिजेल र मट्टीतेलको भाउ बढाएको छ। आजदेखि लागू हुनेगरी प्रतिलिटर १५ रुपैयाँका दरले मूल्य वृद्धि गरिएको निगमले जनाएको छ।

नयाँ मूल्यअनुसार काठमाडौं, पोखरा र दिपायल क्षेत्रमा पेट्रोलको भाउ प्रतिलिटर २०२ रुपैयाँ पुगेको छ भने डिजेल र मट्टीतेलको भाउ प्रतिलिटर १८२ रुपैयाँ कायम भएको छ।

त्यस्तै चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्ज क्षेत्रमा पेट्रोलको भाउ १९९ रुपैयाँ ५० पैसा पुगेको छ भने डिजेल र मट्टीतेलको भाउ १७९ रुपैयाँ ५० पैसा कायम गरिएको छ।

सुर्खेत र दाङ क्षेत्रमा पेट्रोलको भाउ २०१ रुपैयाँ पुगेको छ भने डिजेल र मट्टीतेलको भाउ १८१ रुपैयाँ कायम भएको निगमले जनाएको छ।

नयाँ मूल्यवृद्धिसँगै बजारमा ढुवानी खर्च र दैनिक उपभोग्य वस्तुको मूल्यसमेत बढ्ने अनुमान गरिएको छ।