नवनियुक्त गृहमन्त्री सुधन गुरुङले पदभार ग्रहण गर्दै देशलाई जनादेशअनुसार अघि बढाउने स्पष्ट बताएका छन्। शुक्रबार गृहमन्त्रालयमा आयोजित कार्यक्रममा उनले गलत काम गर्ने कसैलाई छुट नदिने चेतावनी दिँदै हरेक जिल्ला प्रशासन कार्यालयमा अब एकद्वार प्रणालीबाट मात्र सेवा उपलब्ध हुने व्यवस्था लागू गरिने बताए।

गृहमन्त्री गुरुङले भ्रष्टाचार र घुसखोरी रोक्न “कसैले घुस माग्यो भने सिधै मलाई फोन गर्नुस” भनेर नागरिकलाई आग्रह गरेका छन्। उनले प्रहरीलाई नियमअनुसार काम गर्न निर्देशन दिएका छन् भने सञ्चारमाध्यमलाई जिम्मेवार भएर समाचार सम्प्रेषण गर्न, टीआरपीको लोभमा कसैको चरित्र हत्या नगर्न सचेत रहन निर्देशन दिएका छन्।

उनले नागरिकका गुनासाहरू सिधै मन्त्रालयसम्म पुग्ने व्यवस्था मिलाइने र आगामी पाँच वर्ष पूर्णरूपमा सुशासनमा समर्पित भएर छिट्टै ठोस नतिजा देखाउने प्रतिबद्धता व्यक्त गरेका छन्।