बलिउड अभिनेत्री नोरा फतेही र अभिनेता सञ्जय दत्त अभिनित कन्नड चलचित्र ‘केडी: द डेभिल’ को गीत ‘सरके चुनर तेरी सरके’ विवादको केन्द्रबिन्दुमा पुगेको छ। हिन्दी डब संस्करण सार्वजनिक भएपछि गीतका बोल र दृश्यलाई लिएर भारतभर तीव्र विरोध भएको छ। आलोचकहरूले गीतलाई अश्लील, द्विअर्थी र महिलाको गरिमामा चोट पुर्याउने भएको भन्दै सामाजिक सञ्जालमा आक्रोश व्यक्त गरेका छन्।

सूचना तथा प्रसारण मन्त्रालयको दवाबमा केन्द्रीय फिल्म प्रमाणन बोर्डले गीतको हिन्दी संस्करण युट्युब र अन्य डिजिटल प्लेटफर्मबाट हटाएको छ। यसैबीच, १० जना वकीलहरूले नोरा फतेहीको श्रम स्वीकृति रद्द र उनलाई भारतबाट डिपोर्ट गर्न गृह मन्त्रालयमा निवेदन दिएका छन्।

नोरा फतेहीले भिडियो सन्देश मार्फत आफ्नो बचाउ गर्दै हिन्दी डब गर्दा निर्माण पक्षले अनुमति नलिएको दाबी गरेकी छिन्। निर्देशक प्रेमले सार्वजनिक माफी माग्दै गीत सुधार गर्ने प्रतिबद्धता जनाएका छन्।

विशेषज्ञहरूले यस घटनाले अप्रिल ३०, २०२६ मा रिलिज हुने चलचित्रको बक्स अफिसमा असर पार्ने र भारतीय फिल्म उद्योगमा सेन्सरसिप, सिर्जनात्मक स्वतन्त्रता र कलाकारको अधिकारबारे नयाँ बहस सुरु हुने अनुमान गरेका छन्।