पर्सा क्षेत्र नम्बर २ का सांसद सुशील कुमार कानुले वीरगंजको नारायणी अस्पतालमा बिचौलिया र दलालका कारण बिरामीलाई समस्या भएको भन्दै तत्काल नियन्त्रणका लागि कडा कदम चाल्न प्रमुख जिल्ला अधिकारी भोला दाहालसँग अनुरोध गर्नुभएको छ।

मंगलबार प्रजिअ दाहालको कार्यालयमा भएको छलफलमा सांसद कानुले निजी अस्पतालमार्फत बिरामी रेफर गर्ने, एम्बुलेन्स चालकमार्फत दलाली हुने र अस्पताल परिसरमा गैरकानुनी गतिविधि बढ्दै गएको विषयमा गम्भीर चिन्ता व्यक्त गर्नुभयो।

त्यस्तै, सांसद कानुले छठ पर्वमा छठघाट वरिपरि माछा–मासु बिक्री रोक्नुपर्ने र गर्मी मौसममा सम्भावित आगलागी र विपद् व्यवस्थापनका लागि आवश्यक तयारी मिलाउनुपर्नेमा जोड दिनुभयो।

छलफलमा प्रमुख जिल्ला अधिकारी दाहालले आवश्यक अनुगमन, समन्वय र कारबाही अगाडि बढाइने प्रतिबद्धता जनाउनुभएको थियो। कार्यक्रममा रास्वपाका युवा नेता, क्षेत्रीय सभापति तथा अन्य प्रतिनिधिहरू पनि उपस्थित थिए।