नेपाली कांग्रेसका सभापति गगन थापा को उपस्थितिमा वीरगन्जको घण्टाघर क्षेत्रमा आयोजना गरिएको प्रतिज्ञा सभा अपेक्षित जनसहभागिता जुटाउन असफल भएपछि कांग्रेसको स्थानीय संगठन र प्रभावकारितामाथि गम्भीर प्रश्न उठ्न थालेको छ।

प्रतिनिधि सभा निर्वाचनको मुखमै आयोजित सभामा कार्यक्रमस्थलका धेरै कुर्सी खाली देखिनुले कांग्रेसप्रति पर्सावासीको उत्साह कमजोर भएको संकेत दिएको स्थानीय राजनीतिक वृत्तको टिप्पणी छ। ठूला नेता स्वयं उपस्थित हुँदासमेत जनलहर सिर्जना गर्न नसक्नु कांग्रेसका लागि चिन्ताजनक सन्देश भएको विश्लेषकहरू बताउँछन्।

स्थानीयवासीहरूका अनुसार पछिल्ला वर्षहरूमा कांग्रेस नेतृत्वले पर्साका जनसमस्यालाई प्राथमिकतामा नपारेको असन्तुष्टि सभामा देखिएको न्यून उपस्थितिको मुख्य कारण हुनसक्छ। “भाषण धेरै भए, तर स्थानीय मुद्दामा ठोस काम देखिएन,” एक स्थानीय मतदाताले प्रतिक्रिया दिए।

यद्यपि आयोजक पक्षले भने मौसम र समय व्यवस्थापनका कारण अपेक्षित भीड नआएको दाबी गर्दै कार्यक्रम सफल भएको जिकिर गरेको छ। तर सामाजिक सञ्जालमा सार्वजनिक भएका तस्बिरहरूले भने आयोजकको दाबीभन्दा फरक दृश्य देखाएको भन्दै आलोचना बढिरहेको छ।

राजनीतिक विश्लेषकहरूका अनुसार पर्सा क्षेत्रमा कांग्रेसले विगतको प्रभाव कायम राख्न नसक्दा मतदाताहरू वैकल्पिक शक्तितर्फ आकर्षित हुँदै गएका छन्। वीरगन्जको सभामा देखिएको कमजोर उपस्थिति कांग्रेसका लागि चेतावनी हो कि यसलाई सामान्य घटनाका रूपमा लिने भन्ने विषय आगामी दिनमा स्पष्ट हुने उनीहरूको भनाइ छ।