पर्सा क्षेत्र–१ देखि–४ मा फागुन २१ गते हुने प्रतिनिधि सभा निर्वाचन र त्यसअघि पर्ने होली पर्वलाई ध्यानमा राख्दै सुरक्षा कडा गरिएको छ। नेपाली सेना, नेपाल प्रहरी र सशस्त्र प्रहरीको संयुक्त व्यवस्था अन्तर्गत मतदान स्थल र वरिपरिका क्षेत्रमा चौकसी बढाइएको छ।

श्रीजङ्ग गणका गणपति तथा प्रमुख सेनानी लोकेन्द्र कार्कीका अनुसार चार तहको सुरक्षा संयन्त्र लागू गरिएको छ। जोखिमयुक्त मतदान स्थललाई विशेष निगरानीमा राखी चेकपोइन्ट व्यवस्था, मोबाइल गस्ती र मतपेटिका ढुवानीमा पनि सुरक्षा सुनिश्चित गरिएको छ।

सुरक्षा निकायले नागरिक, राजनीतिक दल र सरोकारवालासँग सहकार्य गरेर मतदान र होली पर्व दुवैलाई शान्तिपूर्ण वातावरणमा सम्पन्न गराउने उद्देश्य राखेको छ। कानूनविपरीत गतिविधिमा संलग्न जो–कोहीमाथि तत्काल कारबाही गरिने चेतावनी पनि जारी गरिएको छ।