आगामी फागुन २१ गते हुने प्रतिनिधिसभा निर्वाचनलाई व्यवस्थित, निष्पक्ष र विश्वसनीय बनाउन पर्सा जिल्लामा नमूना मतदान कार्यक्रम सम्पन्न भएको छ।

कार्यक्रममा मतदान केन्द्र सञ्चालन, मतदाता परिचय प्रमाणीकरण, मतपत्र वितरण, गोप्य मतदान, मतपेटिका व्यवस्थापन र सम्भावित विवाद तथा भीड नियन्त्रणसम्बन्धी अभ्यास गरिएको थियो। यसले वास्तविक निर्वाचनको दिन हुने त्रुटि कम गर्न र कर्मचारीलाई व्यवहारिक अनुभव प्रदान गर्न सहयोग पुर्‍याउने विश्वास व्यक्त गरिएको छ।

जिल्ला निर्वाचन अधिकारीले नमूना मतदानले निर्वाचन प्रक्रियामा पारदर्शिता र व्यवस्था सुनिश्चित गर्न महत्वपूर्ण भूमिका खेल्ने बताए। उनले मतदातालाई निर्धक्क भएर मतदान गर्न र सबै सरोकारवालालाई आचारसंहिता पालना गर्दै शान्तिपूर्ण वातावरण कायम गर्न आग्रह पनि गर्नुभएको छ।