पर्सा निर्वाचन क्षेत्र नं. १ का प्रतिनिधिसभा सदस्य उम्मेदवार रामकिशोर सिंह (पराग)ले आज वीरगञ्ज महानगरपालिका वडा नं. ०७ अन्तर्गत कुम्हालटोल र रामटोलमा घरदैलो कार्यक्रम सम्पन्न गर्नुभएको छ।

घरदैलोका क्रममा उहाँले स्थानीयवासी र युवासँग प्रत्यक्ष भेटघाट गर्दै बस्ती व्यवस्थापन, नाला तथा सडक विकास, शिक्षा र स्वास्थ्य सेवासम्बन्धी समस्याबारे गुनासा र सुझाव सुन्नुभयो। युवाहरूले रोजगारीको अभावका कारण केही युवा लागुऔषधको चपेटामा परेको विषय उठाएपछि उम्मेदवार सिंहले निर्वाचित भए लगत्तै रोजगारी सिर्जना, सीपमूलक तालिम र स्वरोजगार कार्यक्रम अघि बढाउने प्रतिबद्धता व्यक्त गर्नुभयो।

स्थानीयवासीहरूले परिणाममुखी नेतृत्वको आवश्यकता औंल्याउँदै उम्मेदवारप्रति विश्वास व्यक्त गरेका छन्। घरदैलो कार्यक्रममा स्थानीय युवा तथा सर्वसाधारणको उल्लेख्य सहभागिता रहेको थियो।