बंगलादेशमा आज कडा सुरक्षा व्यवस्था बीच संसदीय र संवैधानिक जनमतसंग्रह सञ्चालन भइरहेको छ। २०२४ को विद्यार्थी आन्दोलनपश्चात् पहिलो पटक आयोजित यो चुनावमा करिब १२ करोड मतदाताले नयाँ सरकार चयनका लागि मतदान गरिरहेका छन्।

बीबीसीका अनुसार मतदान बिहानदेखि सुरु भई बेलुका साढे ४ बजेसम्म चल्नेछ। मतगणना भोलिदेखि सुरु हुने बताइएको छ। प्रमुख प्रतिस्पर्धी दल बंगलादेश नेशनलिस्ट पार्टी (बीएनपी) र जमात–ए–इस्लामीका शीर्ष नेताहरूले मतदान गरिसकेका छन्। बीएनपी अध्यक्ष तथा सम्भावित प्रधानमन्त्री उम्मेदवार तारिक रहमानले पनि मतदान गर्नुभएको छ।

युवा केन्द्रित नेशनल सिटिजन पार्टीका संयोजक नाहिद इस्लामले पनि मतदान गर्नुभएको छ। तर पूर्वप्रधानमन्त्री शेख हसिनाको अवामी लिग प्रतिबन्धका कारण यस चुनावमा सहभागी छैन।

सन् २०२४ को आन्दोलनपछि अन्तरिम सरकार गठन गरिएको थियो र नोबेल पुरस्कार विजेता मुहम्मद युनुसको नेतृत्वमा निर्वाचन भएको छ। देशभर सुरक्षा कडा पारिएको छ र करिब १० लाख सुरक्षाकर्मी परिचालन गरिएको बीबीसीले जनाएको छ।