पर्सा क्षेत्र नम्बर १ का नेपाली कांग्रेसका उम्मेदवार अनिल रुरङ्गटा माथि स्थानीय व्यापारीहरूसँग सम्बन्धित गम्भीर आरोप सार्वजनिक भएका छन्। स्वतन्त्र उम्मेदवार विशाल कुमारका अनुसार, रुरङ्गटाले चुनावमा मात्र नेपाली मतदाता अगाडि देखा पर्न्छन्, तर आफ्ना व्यवसायमा करिब ९० प्रतिशत रोजगारी विदेशी नागरिकलाई दिने गरेका छन्।

विशाल कुमारले चुनावी सभामा प्रश्न उठाउँदै भने, “नेपालीको भोटले जित्ने, तर रोजगारी दिन चाहिँ विदेशीलाई—यो कस्तो दोहोरो चरित्र हो?” उनका अनुसार रुरङ्गटा चुनावको बेला मात्र जनताको नजरमा देखा पर्छन्, अन्य समयमा समाज र स्थानीय समस्यासँग कुनै सरोकार नराखी व्यक्तिगत व्यापारिक फाइदामा व्यस्त रहने गरेको आरोप छ।

स्थानीयवासी पनि यस्ता प्रवृत्तिप्रति असन्तुष्ट देखिएका छन्। उनीहरूले गुनासो गर्दै भने, “चुनाव सकिएपछि न त अनुहार देखिन्छ, न त आवाज सुन्ने प्रयास हुन्छ।”

राजनीतिक विश्लेषकहरूका अनुसार पर्सा–१ मा उठेका यी आरोपले उम्मेदवारको छवि मात्र प्रभावित नगरी निर्वाचनको माहोलमा असन्तोष र बहस सिर्जना गर्न सक्छ। कांग्रेसका लागि यो चुनौतीपूर्ण परिस्थितिको रूपमा देखिन थालेको छ, जसले अनिल रुरङ्गटाको लोकप्रियता र मत परिणाममा असर पार्न सक्ने सम्भावना बढाएको छ।