नेपाली कांग्रेसका सभापति गगनकुमार थापाले प्रदेश र पालिकाको निर्वाचन अघि नै पार्टीको नियमित महाधिवेशन सम्पन्न हुने बताएका छन्।

निर्वाचन क्षेत्र नम्बर–४ मा पार्टी कार्यकर्तासँगको भेटघाटमा सभापति थापाले महाधिवेशनले पार्टीभित्र टिकट वितरण प्रक्रिया तल्लो तहबाट सुरु हुने दाबी गरे। उनले अब प्रदेशको टिकटका लागि कुनै कार्यकर्ताले सभापति वा महामन्त्रीको घर धाउनु नपर्ने बताए।

थापाले कांग्रेसमा कुनै गुट नरहेको र विगतमा अपनाइएको ६०/४० भागबन्डा प्रणाली अब सकिएको पनि उल्लेख गरे । पार्टीभित्र र बाहिर कुनै प्रकारको भागबन्डा नगर्ने नीतिका साथ कांग्रेसले अब परिवर्तनतर्फ अघि बढेको उनको दाबी छ ।

सभापति थापाले कांग्रेसको नयाँ नेतृत्वले केवल व्यक्ति मात्र नभई सोच, सङ्कल्प, शैली र काम गर्ने तरिकामा समेत परिवर्तन ल्याउने बताउँदै “बदलिएको कांग्रेसले नेपाल बदल्ने” सङ्कल्प व्यक्त गरे ।