नारायणी अस्पतालमा जेनजी युवाको पहलमा नवजात शिशु र सुत्केरी आमाका लागि कपडा वितरण गरिएको छ। राहुल गुप्ताको नेतृत्वमा आयोजित कार्यक्रममा १३५ जना नवजात शिशु तथा उनीहरूका आमालाई आवश्यक कपडा सहयोग प्रदान गरिएको हो।

स्वास्थ्य सेवामा सहकार्य र सामाजिक उत्तरदायित्वलाई केन्द्रमा राखेर कार्यक्रम आयोजना गरिएको जनाइएको छ। कार्यक्रममा सहभागी मधेश प्रदेश उद्योग वाणिज्य संघका अध्यक्ष तथा पर्सा क्षेत्र नम्बर–२ का जसपा नेपालका उम्मेदवार अशोक कुमार टेमानीले यस्ता मानवीय कार्यले समाजमा सहयोग र सद्भावको भावना बलियो बनाउने बताए। नवजात शिशु र आमाको सुरक्षामा सानो सहयोग पनि अर्थपूर्ण हुने उनको भनाइ थियो।

कार्यक्रम संयोजक राहुल गुप्ताले समुदायको वास्तविक आवश्यकतालाई ध्यानमा राखेर कार्यक्रम सञ्चालन गरिएको बताउँदै आगामी दिनमा स्वास्थ्य, शिक्षा र सामाजिक सेवाका क्षेत्रमा थप पहल गरिने जानकारी दिए।

कार्यक्रमले नवजात शिशु र सुत्केरी आमालाई प्रत्यक्ष राहत दिएको भन्दै सहभागीहरूले जेनजी युवाको सक्रियतालाई सकारात्मक रूपमा मूल्याङ्कन गरेका छन्।