पर्सामा फागुन २१ मा हुने प्रतिनिधिसभा निर्वाचनका लागि खटाइने निर्वाचन प्रहरीमा सोचेभन्दा धेरै आवेदन परेको छ। नेपाल प्रहरी र सशस्त्र प्रहरीतर्फ कुल दुई हजार ८५२ जनाको माग गरिएको भए पनि आवेदन संख्या निकै बढी देखिएको हो।

नेपाल प्रहरीतर्फ पाँच हजार ३९९ जना, सशस्त्र प्रहरीतर्फ ५२१ जना आवेदन दर्ता भइसकेका छन् । जिल्ला प्रहरी कार्यालय पर्साका प्रवक्ता हरिबहादुर बस्नेतका अनुसार पहिलो पटक आवेदन दिने पुरुष तीन हजार १४७ र महिला ६०३ छन् । त्यस्तै, विगतमा म्यादी प्रहरीको रूपमा काम गरेका ६८७ पुरुष र १५३ महिला तथा पूर्वसुरक्षाकर्मी १२ पुरुष र एक जना विदेशी सैनिक पनि आवेदन दिएका छन् ।

सशस्त्र प्रहरी बल पर्साका सूचना अधिकारी मोहन निरौलाले भने, “निर्वाचन प्रहरीमा युवादेखि वरिष्ठ उमेर समूहसम्म आवेदन दिइरहेका छन्।” सशस्त्र प्रहरीतर्फ आवेदन दिन माघ ३ गतेसम्म समय दिइएको छ।

रौतहटमा पनि आवेदन उल्लेखनीय रहेको छ। त्यहाँ माग अनुसारको संख्या भन्दा धेरै आवेदन परेको छ। कुल छ हजार ७३६ जनाले आवेदन दिएका छन्, जसमा पाँच हजार ३४८ पुरुष र ९३६ महिला रहेका छन्।