सिरहाको लहान नगरपालिका–१६ आरिदमार टोलमा एक साताअघि जङ्गली हात्तीको आक्रमणबाट क्षति व्यहोरेका १० घरपरिवारलाई लहान नगरपालिकाले आइतबार राहत वितरण गरेको छ।

पुस १७ गते राति भएको हात्ती आक्रमणबाट प्रभावित परिवारलाई प्रतिघर ५०–५० किलो चामलसहित खाद्यान्न वितरण गरिएको नगरप्रमुख महेश चौधरीले जानकारी दिए। साथै वृद्धवृद्धा, सुत्केरी तथा विशेष संवेदनशील परिवारलाई फाइबर सिरकसमेत उपलब्ध गराइएको छ।

नगरप्रमुख चौधरीका अनुसार घर मर्मत तथा पुनःस्थापनाका लागि प्रत्येक पीडित परिवारलाई १० हजार रुपैयाँ नगद राहत प्रदान गरिनेछ। उनले दीर्घकालीन रूपमा जङ्गली जनावरको जोखिम न्यूनीकरण गर्न डिभिजन वन कार्यालय, सुरक्षाकर्मी र स्थानीय समुदायसँग समन्वय गरी पूर्वसूचना प्रणाली, निगरानी तथा जनचेतनामूलक कार्यक्रम सञ्चालन गरिने बताए।