वीरगंज महानगरपालिकाले सरस्वती पूजाको बहानामा विद्यार्थीबाट शुल्क वा चन्दा नउठाउन सबै विद्यालयलाई निर्देशन दिएको छ।

निजी विद्यालयहरूले सरस्वती पूजाका नाममा रकम संकलन गर्न थालेको अभिभावकहरूको गुनासो आएपछि महानगरले बिहीबार औपचारिक सूचना जारी गरेको हो।

महानगरको शैक्षिक प्रशासन महाशाखा प्रमुख आनन्द लामिछानेद्वारा जारी सूचनामा विद्यार्थीबाट कुनै पनि शीर्षकमा शुल्क वा चन्दा नलिन, लिइरहेको भए तत्काल रोक्न र उठाइसकेको रकम फिर्ता गर्न स्पष्ट निर्देशन दिइएको छ।

साथै सरस्वती पूजाको अवसरमा गरिने सम्पूर्ण गतिविधि मर्यादित, व्यवस्थित र शैक्षिक उद्देश्य अनुरूप सञ्चालन गर्न महानगरपालिकाले विद्यालयहरूलाई आग्रह गरेको छ।