पर्सा प्रहरीले वीरगंज–पोखरिया सडकखण्डबाट लागुऔषध चरेशसहित दुईजनालाई पक्राउ गरेको छ। पक्राउ पर्नेमा वीरगंज–१५ का २० वर्षीय रैयास अलि र पोखरिया–८ का ५५ वर्षीय मुनिलाल पटेल रहेका छन् ।

जिल्ला प्रहरी कार्यालय पर्साका अनुसार उनीहरू विन्दवादिनी–२, गर्दौल चोक नजिकैबाट पक्राउ परेका हुन्। उनीहरूले कालो झोलामा राखिएको १० लिटरको ग्यालिनमा पानीसँग घिउ मिसाई चरेश छोपेर लैजाँदै थिए ।

खानतलासी गर्दा पटेलको ग्यालिनबाट ११ किलो ४ सय ग्राम चरेश, २९ सय नेपाली रुपैयाँ र एउटा किप्याड मोबाइल बरामद भएको छ। रैयासको साथबाट १० किलो ६ सय ग्राम चरेश र १५ सय ५० रुपैयाँ फेला परेको छ।

पक्राउ परेकाहरूमाथि आवश्यक अनुसन्धान जारी रहेको जिल्ला प्रहरी कार्यालय पर्साले जनाएको छ।