काठमाडौँबाट भद्रपुर आउँदै गरेको बुद्ध एयरको एटीआर–७२ विमान शुक्रबार राति अवतरण गर्ने क्रममा दुर्घटनामा परेको छ। रनवे पार गर्दै करिब ३०० मिटर पूर्वतर्फ घाँसे झाडी र माटोमा भासिँदा भएको दुर्घटनामा चालक दलका एक सदस्यसहित सात जना यात्रु घाइते भएका छन्।

जिल्ला प्रहरी कार्यालय झापाका अनुसार दुर्घटना राति ९ः१० बजे भएको हो। कलसाइन ९०१ रहेको उक्त विमानमा ५१ जना यात्रु, चार जना चालक दलका सदस्य र एक जना इन्जिनियर गरी कुल ५६ जना सवार थिए। घाइतेहरूको अवस्था खतरामुक्त रहेको र दुर्घटनाको कारणबारे थप अनुसन्धान भइरहेको प्रहरीले जनाएको छ।