सप्तरी प्रहरीले तिलाठी कोइलाडी गाउँपालिका–८, तोपा बजारबाट ब्राउनसुगरसहित तीनजनालाई नियन्त्रणमा लिएको छ।

जिल्ला प्रहरी कार्यालय सप्तरीका प्रहरी नायब उपरीक्षक डम्बर बहादुर पुरीका अनुसार, विशेष सूचनाको आधारमा खटिएको टोलीले प्र.१-०४-००१ ज ००४५ नम्बरको गाडी चेक गर्ने क्रममा मोरङको बेलबारी नगरपालिका–४ चुम्मा डाडाका ३२ वर्षीय अनुरोध निरौलाको साथबाट २०५.८ ग्राम ब्राउनसुगर फेला पारेको हो।

अनुरोध निरौलासँगै गाडी चालक विराटनगर–१७ रानीटोल बस्ने ३७ वर्षीय रजप आलम र वडा–४ जामुनगाछी बस्ने २१ वर्षीय निकेश कुमार शर्मालाई पनि नियन्त्रणमा लिइएको छ।

जिल्ला प्रहरी कार्यालय सप्तरीले तीनैजनालाई लागुऔषध कारोबार ऐनअनुसार कानुनी कारबाही हुने जनाएको छ।