तराईका विभिन्न ठाउँमा बाक्लो हुस्सु, कुहिरो र सम्भावित शीतलहरका कारण जनजीवन प्रभावित भएपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले उच्च सतर्कता अपनाउन अपिल गरेको छ। प्राधिकरणले सरोकारवाला निकायलाई पूर्वतयारी र प्रतिकार्यमा सक्रिय रहन निर्देशन दिएको हो।

प्राधिकरणका अनुसार ‘शीतलहर पूर्वतयारी तथा प्रतिकार्य राष्ट्रिय कार्ययोजना, २०८२’ कार्यान्वयनका लागि संघीय मन्त्रालय, प्रदेश सरकार र स्थानीय तहलाई जिम्मेवारीसहित आग्रह गरिएको छ। विपन्न परिवारका लागि न्यानो लुगा वितरण, सचेतना कार्यक्रम, सार्वजनिक भवनमा न्यानो बसाइको व्यवस्था र आवश्यक दाउरा तथा उपकरणको जोहो गर्न भनिएको छ।

यता जल तथा मौसम विज्ञान विभागले तराईमा बाक्लो हुस्सु र कुहिरो कम्तीमा अझै तीन दिन कायम रहने जनाएको छ। यसले स्वास्थ्य, सडक तथा हवाई यातायातमा असर पार्न सक्ने भन्दै विभागले सबैलाई सावधानी अपनाउन, न्यानो भएर बस्न र तातो झोलिलो खानेकुरा सेवन गर्न अनुरोध गरेको छ।