एसटिपि खबर

वीरगन्ज छपकैया–श्रीसिया क्षेत्रमा रातको समयमा तस्करी भइरहेको स्थानीयको आरोप, प्रहरी भूमिकामाथि प्रश्न

वीरगञ्ज । वीरगञ्ज महानगरपालिकाका छपकैया, खाल्वाटोला, श्रीसिया तथा पन्टोका आसपासका क्षेत्रमा रातको समयमा खोलाको किनार हुँदै तस्करी भइरहेको स्थानीयवासीले आरोप लगाएका छन्।

स्थानीयवासीका अनुसार उक्त क्षेत्रमा लामो समयदेखि तस्करीको समस्या रहँदै आएको भए पनि प्रभावकारी रूपमा नियन्त्रण हुन सकेको छैन। उनीहरूले पटक–पटक विवादमा आउने गरेको यो क्षेत्रमा प्रहरीको निगरानी र कारबाही प्रभावकारी नहुँदा समस्या झन् बढ्दै गएको दाबी गरेका छन्।

स्थानीयहरूले हाल छपकैया प्रहरी चौकीका वरिष्ठ सई नेत्र राणाको कार्यकालमा तस्करी अझ बढेको आरोप लगाएका छन्। उनीहरूले पर्सा प्रहरीका डिएसपी चक्र मल्ल, बिर्ता प्रहरी कार्यालयका प्रहरी निरीक्षक विक्रम सुवेदी र वरिष्ठ सई नेत्र राणाको भूमिकामाथि समेत प्रश्न उठाउँदै उनीहरूको मिलेमतोमा तस्करी भइरहेको दाबी गरेका छन्।

त्यसैगरी, वरिष्ठ सई नेत्र राणा विभिन्न विवादमा पटक–पटक जोडिने गरेको र केही समयपछि ती विषयहरू सेलाउने गरेको स्थानीयको भनाइ छ। यसलाई लिएर स्थानीयवासीले ‘आर्थिक चलखेलका कारण घटनाहरू दबाइने गरेको हो कि?’ भन्ने प्रश्नसमेत उठाएका छन्।

स्थानीयवासीले प्रहरी प्रधान कार्यालय तथा सम्बन्धित उच्च अधिकारीसमक्ष यस विषयमा निष्पक्ष छानबिन गर्न माग गरेका छन्। उनीहरूको प्रश्न छ—यदि प्रहरी अधिकारीमाथि पटक–पटक यस्ता आरोप उठिरहेका छन् भने सम्बन्धित निकायले अहिलेसम्म किन प्रभावकारी छानबिन वा कारबाही अघि बढाएको छैन?

यद्यपि, प्रहरी अधिकारीहरूको तस्करीमा संलग्नता वा आर्थिक चलखेल भएको भन्ने आरोप स्वतन्त्र रूपमा पुष्टि भइसकेको छैन। त्यसैले आरोपको सत्यतथ्य पत्ता लगाउन सम्बन्धित प्रहरी अधिकारीहरूको प्रतिक्रिया, घटनास्थलको स्थलगत अनुगमन तथा आवश्यक प्रमाणका आधारमा निष्पक्ष अनुसन्धान आवश्यक देखिन्छ।

स्थानीयवासीको माग : तस्करी नियन्त्रण होस्, आरोपमाथि निष्पक्ष छानबिन होस्।