जिल्ला प्रशासन कार्यालय पर्सा मा सेवाग्राहीले भोग्दै आएका झन्झट र प्रशासनिक अड्चन हटाउन नवनिर्वाचित सांसदहरूले चासो देखाएका छन्।

हरि पन्त (पर्सा–१) र सुशील साह कानु (पर्सा–२) जिल्ला प्रशासन कार्यालय पुगेर अनुगमन गर्दै सेवा प्रवाहबारे विस्तृत जानकारी लिनुभएको हो। अनुगमनका क्रममा उहाँहरूले सेवा लिन आएका सर्वसाधारणसँग प्रत्यक्ष संवाद पनि गर्नुभएको थियो।

सेवाग्राहीहरूले एउटै फाइलमा ‘तोक’ लगाउन र स्वीकृत गराउन विभिन्न कोठा धाउनुपर्ने, साना कामका लागि पनि लामो समय कुर्नुपर्ने र प्रशासनिक प्रक्रिया झन्झटिलो रहेको गुनासो गरेका थिए।

त्यसपछि सांसदद्वयले प्रमुख जिल्ला अधिकारी भोला दाहाल सँग भेटेर सेवा प्रवाह सुधारका उपायबारे छलफल गर्नुभएको थियो। प्रजिअ दाहालले सेवालाई प्रविधिमैत्री र सरलीकृत बनाउन विभिन्न सुधारका काम भइरहेको जानकारी दिँदै कार्यालयलाई बिचौलियामुक्त बनाउन ‘एकद्वार प्रणाली’ लागू गर्ने तयारी गरिएको बताउनुभयो।

सांसदद्वय पन्त र साहले सरकारी कार्यालयमा जनताले सास्ती पाउनु लोकतन्त्रको उपहास भएको उल्लेख गर्दै नागरिकले राज्यबाट पाउने सेवा सहज, छिटो र सम्मानजनक ढंगले पाउनुपर्ने बताउनुभयो। उहाँहरूले प्रशासनले सुरु गरेको सुधारका कामले सेवाग्राहीलाई राहत पुग्ने विश्वास व्यक्त गर्नुभएको छ।