वीरगंज , ४ फागुन –

मुख्यमन्त्री कृष्ण यादवले प्रदेशको सय दिने उपलब्धि सार्वजनिक गर्दै ई–रिक्सा, अटो र ट्याक्टर चलाएर जीविकोपार्जन गर्ने विपन्न नागरिकलाई लिखित परीक्षा बिना नै प्रयोगात्मक परीक्षा पास गरी लाइसेन्स लिन मिल्ने व्यवस्था घोषणा गरेका छन्। सरकारको यो कदम गरिब र मजदुर वर्गको रोजगारी सुरक्षित राख्ने उद्देश्यले ल्याइएको हो।

यस्तै, स्वास्थ्य क्षेत्रमा पनि सुधारको योजना अघि बढाइएको छ। अब बिरामीले उपचार गराउने अस्पतालमार्फतै भुक्तानी पाउने व्यवस्था मिलाइने छ र मोबाइलबाटै ई–टिकट काट्ने सुविधा उपलब्ध गराइनेछ। विगत दुई वर्ष रोकिएको औषधि खरिद प्रक्रिया पनि पुनः सुरु गरिएको छ।

प्रदेश सरकारले खेलकुद र धार्मिक पर्यटन प्रवर्द्धनका लागि ठूला पूर्वाधार निर्माणका योजनाहरू अघि सारेको छ। मुख्यमन्त्री यादवले जनमैत्री कामलाई प्राथमिकता दिँदै आगामी दिनमा यी योजनाहरूलाई द्रुत गतिमा कार्यान्वयन गर्ने प्रतिबद्धता व्यक्त गरेका छन्।