जिल्ला प्रशासन कार्यालय पर्साले एलपी ग्यासको अभाव नरहेको दाबी गरेको भए पनि वीरगञ्जसहितका विभिन्न क्षेत्रमा उपभोक्ताहरू बिहानैदेखि ग्यास पाउन लाइन बस्न बाध्य भएका छन्।

उपभोक्ताहरूका अनुसार, ग्यास व्यवसायीको पसलअगाडि लामो लाइन भए पनि सिलिण्डर पाउने निश्चितता छैन। धेरैले पटक–पटक पसल घुम्नुपर्ने अवस्था रहेको गुनासो गरेका छन्।

खुद्रा व्यवसायीहरूका अनुसार, कम्पनीबाट पर्याप्त ग्यास सिलिण्डर उपलब्ध नभएकाले उनीहरूलाई ग्राहकलाई सहज रूपमा ग्यास उपलब्ध गराउन समस्या भइरहेको छ।

तर सरकारी निकाय र ग्यास उद्योगले भने देशभर ग्यासको आपूर्ति नियमित भइरहेको र अभाव नरहेको बताइरहेका छन्। बजारमा देखिएको वास्तविक अवस्था भने उपभोक्ताका लागि चुनौतीपूर्ण रहेको छ।