वीरगंजको हरपतगन्जमा जारी गढीमाई प्रिमियर लिग टि–२० क्रिकेट प्रतियोगितामा बुधबार भएको पहिलो सेमिफाइनलमा टेढा टाइगरले १ सय १९ रनको फराकिलो अन्तरले हरपतगन्ज युथ किंग्सलाई पराजित गर्दै फाइनलमा स्थान सुरक्षित गरेको छ।

टस जितेर पहिले ब्याटिङ गरेको टेढा टाइगरले २० ओभरमा ७ विकेट गुमाएर १ सय ८५ रन बनाएको थियो। टिमका लोकेश पटेलले ४५ र दिलीप सिंहले २९ रन बनाए।

जवाफी ब्याटिङमा आएको हरपतगन्ज युथ किंग्सले टेढा टाइगर्सका बलरका अगाडि मात्र १६ ओभर ४ बलमा ६६ रनमै सबै विकेट गुमायो। रामप्रवेश मण्डलले तीन र संजीव यादवले दुई विकेट लिए। हरपतगन्जका आरिफ शेखले सर्वाधिक २१ र अभिषेक सिंहले १३ रन बनाए।

टेढा टाइगर्सका अलिराजले चार र अल्ताफ अन्सारीले दुई विकेट लिए। लोकेश पटेललाई ‘म्यान अफ द म्याच’ घोषणा गरिएको छ।

दोस्रो सेमिफाइनल बिहीबार अठराहा टाइगर्स र गढीमाई वारियर्सबीच खेलिनेछ।