आज देशभर माघे सङ्क्रान्ति पर्व परम्परागत श्रद्धा र उत्साहका साथ मनाइँदैछ । सूर्य मकर राशिमा प्रवेश गर्ने भएकाले माघ १ लाई मकर सङ्क्रान्ति पनि भनिन्छ । यसै दिनदेखि उत्तरायण सुरू भई दिन लम्बिँदै जाने विश्वास छ ।

आजको दिन स्नान, ध्यान र दानलाई पुण्यदायी मानिने भएकाले देवघाट, कालीगण्डकी, त्रिशूली, रिडी लगायतका तीर्थस्थलमा भक्तजनको भीड लागेको छ । तराई क्षेत्रमा यो पर्व ‘नहान’ का रूपमा मनाइन्छ ।

माघे सङ्क्रान्तिमा घ्यू, चाकु, तिल, तरुल र खिचडी खाने चलन छ, जसले जाडोमा शरीरलाई न्यानो राख्ने विश्वास गरिन्छ । साथै यही अवसरमा राष्ट्रिय कृषि जैविक विविधता दिवस पनि मनाइँदैछ ।