जिल्ला प्रशासन कार्यालय पर्साले सामाजिक तथा धार्मिक सद्भावमा असर पार्ने गतिविधि नगर्न सर्वसाधारणलाई सचेत गराएको छ।

प्रमुख जिल्ला अधिकारी भोला दाहालद्वारा आइतबार जारी विज्ञप्तिमा सामाजिक सञ्जालमार्फत कुनै पनि धर्म, जात वा समुदायविरुद्ध घृणा फैलाउने, अफवाह सिर्जना गर्ने तथा आपत्तिजनक सामग्री प्रकाशन र सेयर गर्न नहुने उल्लेख गरिएको छ।

प्रशासनका अनुसार यस्ता गतिविधि मुलुकी अपराध संहिता २०७४ तथा विद्युतीय कारोबार ऐन २०६३ अनुसार दण्डनीय छन्। धार्मिक भावना भड्काउने वा सार्वजनिक शान्ति खल्बल्याउने कार्यमा संलग्नलाई कैद र जरिवानासहित कडा कानुनी कारबाही गरिने चेतावनी दिइएको छ।

धार्मिक सहिष्णुता, सामाजिक सद्भाव र शान्ति कायम राख्न सबै नागरिक, सञ्चारकर्मी तथा सामाजिक सञ्जाल प्रयोगकर्तालाई जिम्मेवार बन्न र असत्य तथा उत्तेजक सूचना प्रसारण नगर्न प्रशासनले आग्रह गरेको छ।