बारामा नेपाल प्रहरीका एक अधिकृतसँग रहेको सरकारी पेस्तोल हराएको घटना मधेस प्रदेश प्रहरीमा सनसनी बनाएको छ।

इलाका प्रहरी कार्यालय कबहीमा कार्यरत प्रहरी नायब निरीक्षक (सई) सोनुकुमार मिश्रले बोकेको ९ एमएमको पेस्तोल पुस ११ गते रहस्यमय ढंगले हराएको घटना बाहिरिएलगत्तै प्रदेश प्रहरी कार्यालय जनकपुरले युनिटका सईदेखि कार्यालय सहयोगीसम्म १२ जना प्रहरीलाई सोधपुछ र छानबिनका लागि तानेको छ। त्यहाँको प्रारम्भिक अनुसन्धानपछि कबहीमा नयाँ प्रहरी टोली खटाइएको छ।

प्रदेश प्रहरी प्रमुख डीआईजी गोविन्द थपलियाले एसपी भेष रिजालको नेतृत्वमा चार सदस्यीय छानबिन समिति गठन गरेका थिए। प्रारम्भिक अध्ययनमा सई मिश्रले पेस्तोल राति गस्तीको क्रममा हराएको बताएको भए पनि उनले ब्यारेकबाटै हतियार हराएको भन्ने अर्का बयान पनि दिएका छन्। यसले घटनाको विवरण अस्पष्ट र शंकास्पद बनाएको छ।

एसपी रिजालका अनुसार सबै प्रहरी कर्मचारीलाई अलग–अलग राखेर सोधपुछ भइरहेको छ र दोषी देखिएका कर्मचारीविरुद्ध कानुनी कारबाही अघि बढाइनेछ।