वीरगंज महानगरपालिका–२७ दरदर्वामा प्रहरीले अवैध काठको फर्निचर सहित एक जनालाई पक्राउ गरेको छ। वडा प्रहरी कार्यालय श्रीपुरको टोलीले गस्तीका क्रममा पर्सागढी नगरपालिका–४ बस्ने ४८ वर्षीय उपेन्द्रप्रसाद कुर्मीले चलाएको ना२च २८३५ नम्बरको पिकअप गाडीमा सालको काठबाट बनाइएका अवैध फर्निचर फेला पारेको हो।

पक्राउ परेका गाडीमा सालको चौकस दुई थान, सालको झ्याल दुई थान, अधुरो बक्स प्लाई सेट तीन थान, अधुरो कुर्सी चार थान र डाइनिङ टेबल एक थान रहेको प्रहरीले जनाएको छ।

कुर्मीलाई फर्निचर र गाडीसहित डिभिजन वन कार्यालय पर्साको जिम्मा लगाइएको छ भने थप कारबाहीको प्रक्रिया अघि बढाइएको पर्सा प्रहरीले जनाएको छ।