मधेश केन्द्रित दल जनता समाजवादी पार्टी (जसपा) नेपाल र लोकतान्त्रिक समाजवादी पार्टी (लोसपा) नेपालबीच एकीकरण गर्ने निर्णय भएको छ। दुवै पार्टीका अध्यक्षहरूले सहमति पत्रमा हस्ताक्षर गरेका छन्।

काठमाडौंमा बसेको जसपा अध्यक्ष उपेन्द्र यादव र लोसपा अध्यक्ष महन्थ ठाकुरसहित दुवै दलका पदाधिकारीहरूको संयुक्त बैठकले वर्तमान राजनीतिक परिस्थितिको मूल्यांकन गर्दै एकीकरण गर्ने निर्णय गरेको हो।

विज्ञप्तिमा संघीय लोकतान्त्रिक गणतन्त्र, संघीयता, पहिचान, समानुपातिक समावेशिता र सामाजिक न्यायका मुद्दालाई मजबुत बनाउँदै न्यायपूर्ण समाज निर्माणका लागि एकता आवश्यक रहेको उल्लेख छ।

यसअघि २०७७ वैशाख १० मा सपा र राजपा एकीकरण भएर जसपा बनेको थियो भने २०७८ भदौमा विभाजन भई महन्थ ठाकुर नेतृत्वमा लोसपा गठन भएको थियो।