पोखरिया स्थित मालपोत कार्यालयबाट प्रहरीले तीन जना बिचौलियालाई पक्राउ गरेको छ। ईलाका प्रहरी कार्यालय पोखरिया बाट शुक्रबार खटिएको प्रहरी टोलीले कार्यालयभित्रबाट उनीहरूलाई नियन्त्रणमा लिएको हो।

प्रहरीका अनुसार कार्यालयमा अनावश्यक रूपमा प्रवेश गरी सेवाग्राहीलाई हैरान पार्ने तथा कर्मचारीलाई समेत दुःख दिने गुनासो आएपछि तीन जनालाई नियन्त्रणमा लिइएको हो। पक्राउ परेकाहरूको नाम भने प्रहरीले सार्वजनिक गरेको छैन।

प्रहरी निरीक्षक प्रदीप पौडेलका अनुसार नियन्त्रणमा लिइएका व्यक्तिहरूले आफू लेखापढी व्यवसायी भएको दाबी गरेका छन्। उनीहरूलाई इलाका प्रहरी कार्यालयमा राखेर थप अनुसन्धान भइरहेको प्रहरीले जनाएको छ।