पर्सा जिल्लामा भ्रष्टाचार र अनियमितता नियन्त्रणका लागि जेनजी यूथ फोर्सको जिल्ला स्तरीय बैठक मंगलबार वीरगंजमा सम्पन्न भएको छ। बैठकले जिल्लाका विभिन्न पालिका र वडामा भइरहेको भ्रष्ट गतिविधि उजागर गर्ने र संलग्न जनप्रतिनिधि तथा कर्मचारीलाई कानूनी कारबाहीको दायरामा ल्याउने निर्णय गरेको छ।

संगठनका विशेष सदस्य साहले भने, “अब सहने समय सकिएको छ। पालिकामा अनियमितता गर्नेहरूलाई सार्वजनिक गरिनेछ र युवाहरू परिवर्तनका लागि सक्रिय हुनेछन्।” बैठकमा युवाहरूको सहभागिता बढाउने, संगठन सशक्त बनाउने र युवा नेतृत्व विकासमा जोड दिने विषयमा पनि व्यापक छलफल भएको थियो।

बैठकले छिट्टै टोल, वडा, पालिका, महानगरपालिका र जिल्ला स्तरमा समिति गठन गर्ने निर्णय गरेको जानकारी दिइयो। यस पहलले पर्सामा पारदर्शिता र जवाफदेहिता सुनिश्चित गर्ने दिशामा युवाहरूको सक्रिय भूमिका बढाउने अपेक्षा गरिएको छ।