वीरगञ्ज महानगरपालिका मा ११ वर्षीया बालिकामाथि यौन दुर्व्यवहारको प्रयास गरेको आरोपमा एक जनालाई प्रहरीले पक्राउ गरेको छ। वीरगञ्ज–८ दुर्गा रोड क्षेत्रमा पसल सञ्चालन गर्दै आएका ५० वर्षीय इस्माइल मियालाई प्रहरीले नियन्त्रणमा लिएको हो।

परिवारका अनुसार बालिका पुरानो बाँकी रकम तिर्न पसलमा गएकी बेला ती व्यक्तिले पसलभित्र लगेर अनुचित व्यवहार गर्न खोजेको आरोप छ। बालिकाले प्रतिकार गर्दै त्यहाँबाट उम्किएर घर पुगेर परिवारलाई घटनाबारे जानकारी गराएकी थिइन्।

घटनापछि परिवारले वडा प्रहरी कार्यालय बिर्ता मा निवेदन दिएपछि प्रहरीले खोजी गरी उनलाई पक्राउ गरेको जिल्ला प्रहरी कार्यालय पर्सा ले जनाएको छ।

प्रहरीका अनुसार घटनाबारे थप अनुसन्धान भइरहेको छ। नाबालिकासँग सम्बन्धित संवेदनशील घटना भएकाले प्रहरीले कानुनी प्रक्रिया अनुसार आवश्यक अनुसन्धान अघि बढाइएको जनाएको छ।